سنة ٢٠٠٩ وقفت في أكبر قاعة في جامعة القاهرة عشان أكون المتحدثة باسم خريجي دفعة كلية الإعلام شعبة اللغة الانجليزية ، مش لأنه بس تم اختياري عشان أكتب وأقول “خطاب التخرج” لكن لاني كمان كنت التانية على الدفعة ……
-فلاش باك –
بنت عندها ١٠ سنين قاعدة بتتفرج على التليفزيون ومتنحهه بشكل مبالغ فيه؛ أمي دايماً كانت بتقول رحاب مجنونة سينما بتحب الفن وبتقعد تدقق في كل التفاصيل وتتأثر بالحوار وفعلا كنت قاعدة مركزة جداً في الفيلم اللي بطله كان الرائع عادل أدهم عشان ألاقيه وفي أحد المشاهد المهمة بيقول بصوته المميز “ماتبُصش يا بني لفوق عشان اللي يبُص لفوق يتعب” !
-قطع-
أو كما يقول العاملون بالسينما “CUT” !
كبرت وجملة “عادل ادهم” بترن في وداني “ماتبُصش لفوق يا بني عشان اللي يبُص لفوق يتعب” ….
وها أنا ذَا داخله على السنة الفاصلة في حياة أي مواطن مصري متعلم …. الثانوية العامة !
أمي مش متنبألي بأي مستقبل ولها كامل الحق أنا شخصية فاشلة في الدراسة وواضح انه مافيش أمل !
دخلت أدبي عشان بحب التاريخ وفي لحظة معينة قررت إني أدخل إعلام لإني عايزة أكتب ….
عايزة أبقى صحفية….
“كلية إعلام دي من كليات القمة بلاش يا بنتي ؛ قالوها زمان ما تبُصيش لفوق عشان ماتتعبيش” !
-قطع-
كنت باكل الورق أكل مش عشان دحاحة بس عشان قررت أبص لفوق ….. لفوق أوي وأتعب !
وفعلا تعبت وعافرت لحد اما جبت مجموع ودخلت كلية الإعلام وفضلت الحمدلله طول الأربع سنين من الأوائل !
-قطع-
وانا وافقه في أكبر قاعة في جامعة القاهرة عشان أقول خطاب تخرج الدفعة أمام آلاف من الحاضرين …..
واقفه عشان أقول أول وأهم حاجة بالنسبالي للكل
” بُص لفوق وأحلم وحاول ….. وأتعب أتعب أتعب …… عشان اما توصل تعبك ده هو اللي هيحسسك بطعم النجاح”
خُذ نص المثل الاول؛
بُص لفوق ….. لفوق أوي ………….. وأتعب
