ماتتجوزيش ..

ملحوظة : هذه المدونة بالعامية المصرية

ماتتجوزيش ..

ماتتجوزيش عشان اهلك بيضغطوا عليكي ….
ماتتجوزيش عشان صحابك كلهم اتجوزوا ……
ولا عشان كلام الناس اللي يقولك “وإنتي هتفضلي قاعدة كده ، مش شايفه انك كبرتي ، طب وإنتي كده هتعرفي تخلفي ، القطارررررررررر ……
ولا عشان حاسه انك قلقانه وخايفه من بكرة …..
ماتتجوزيش عشان “جه وقت الجواز” …..
وماتتجوزيش عشان محتاجه “راجل” …..
ولا عشان “بقيت لوحدي في الدنيا بعد ما كل الناس مشيوا” ……..
ماتتجوزيش ……..
اوعي تتجوزي عشان اي من الأسباب السابقة …..
انا عارفه ان الضغوط صعبة والكلام اللي فوق ده مرعب في لحظات كتير وان عقلك بيفكر وبيسأل وساعات الاجابات بتخونه !
بس حاولي تخلقي إجاباتك ……
اتجوزي اما تلاقي الانسان اللي تشوفي معاه بكرة ،
اللي تحسي معاه بالامان …..
اللي تحلمي معاه وتشوفي نفسكم شايبين سوا وانتوا بتتخنقوا على مين يملا ازايز الميه الفاضيه 🙂 ….
مش رومانسية لكن دي الحياة …..
دي هتبقى حياتك ….
ده هيبقى مستقبلك …….
اوعي ترضي بمستقبل انتي مش قابلاه بس عشان كلام الناس !
اصعب ما يكون انك تعيشي مع بني ادم قلبك مابيحبوش ، بعد وقت بعد سنين هتحسي بده !
هتحسي ان مافيش اي حاجة تساوي انك تضحي بسنين عمرك عشان “الناس كانت بتقولك يله بقى” !
مافيش اي حاجة تساوي انك “ماتختاريش” مستقبلك حتى لو كان التمن انك #ما_تتجوزيش …..
غير اما تلاقي حلمك …… وهتلاقيه
لان الحب رزق ….. وربنا يرزقك !

ملحوظة:

التدوينات المنشورة في مدونات هافينغتون بوست لا تعبر عن وجهة نظر فريق تحرير الموقع