راح تمر !

من فترة مريت بمرحلة كئيبة شويه ؛
كان عندي مشاكل كتير -زيي زي اي بني ادم عادي- الأزمة بس اني باخد الامور على عواطفي بزيادة !
تعبت جدا واتضايقت وقررت انسحب من الحياة !

قررت اختفي يومين لا أكلم حد ولا أرد على التليفون !
وعدوا اليومين -خلينا نتفق ان اللي عايز يوصلك هيوصلك- واللي انت مهم بالنسباله مش هيسيبك أبدا !
بس الفكرة اننا ساعات بنبي سُوَر حوالينا بيمنع اي حد من الوصول !
السور ده بيفصل ما بينك و بينهم ؛
السور ده بيمنع إحساسهم انه يوصلك ؛

السور ده بيفصل ما بين احتمالية كل شئ جميل و بين الرغبة في الانعزال !
في ناس هتحاول تنطه عشان توصلك -ودول كويسين مافيش كلام- بس ده مش الطبيعي ولا ده المطلوب !
مش المطلوب إطلاقا انك تصعبها على البشر عشان يحبوك ويقربوا منك ويبقوا موجودين ….
لان بوجود السور ده يكاد يكون مستحيل …

الوصول !
والاهم من الوصول انه بعد ما اليومين بتوع الاختفاء يعدوا هترجع للحياة هتكتشف انها مكملة عادي …..
مع انهم يومين هتحس ان كل حاجة اتغيرت
ولا حاجة / ولا حد استناك !

وعشان كده دايما اما بتمر عليه اللحظات دي بحاول أفتكر كلام عمنا صلاح جاهين اما قال :
“يأسك وصبرك بين ايديك وانت حر
تيأس ما تيأس الحياة راح تمر
أنا دقت من دة ومن دة وعجبي لقيت
الصبر مر وبرضه اليأس مر
عجبي”

تيأس ما تيأس الحياة راح تمر ………..
راح تمر !

ملحوظة:

التدوينات المنشورة في مدونات هافينغتون بوست لا تعبر عن وجهة نظر فريق تحرير الموقع.