هذه المدونة بالعامية
– لو سألتك إنت مصري تقولي إيه ؟
– أيوة مصري و ابن مصري و ابن مصر الله عليها .
– ما شاء الله .. ما شاء الله .. للدرجة دي بتحب مصر ؟
– بحب مصر ؟!!!! و هو ده سؤال يا أستاذة ؟!!!!! مصر هي أمي و نيلها هو دمي .. حتى شوفي .. شمسها ف سماري .. شكلها ف ملامحي .
– حلو .. حلو .. طب بتحب الحكومة ؟!!
– الحكومة دي بنت كلب .
– عيب على فكرة .. ليه الشتيمة و الألفاظ دي حضرتك ؟!!!
– إذا عرف السبب يا أستاذة بطل العجب .. مصر جميلة لكن الحكومة لأ .. عملتلي إيه الحكومة ؟ مفيش تعليم محترم ، مفيش رعاية صحية ، مفيش مواصلات ، مفيش شقة ، الأسعار نار .
– بتحب مصر ؟
– طبعا بحب مصر .. هو عشان مبحبش الحكومة يقوم ده يأثر على حبي لمصر !!!! مصر هي أمي يا أستاذة .. أمي .. حد يكره أمه ؟!!
– طب بتحب الشرطة ؟؟
– الشرطة دي بقى بالذات بنت كلب .
– تاني ؟!!! يا أستاذ قلنا كده عيب ميصحش .
– أصل الشرطة دي بقى حضرتك بتحب تعمل السليمة مع الشعب دايما .. و بتعامله على إن المواطن متهم إلى أن تثبت براءته ، و بتحب تسكه على قفاه .. و دايما المواطن عندهم عبيط و مطلوب من الشرطة إنها تمنع العبيط ده من إهدار حقوقه ، من أول شرطة المرور اللي لازم تصبحي على كل فرد فيها باللي فيه القسمة .. لحد شرطة المطار اللي لازم تجمرك الحاجة اللي معاك بإنها تقسمها معاك .. لحد المباحث اللي شعارها ” سك المواطن على قفاه ينعدل حاله ” ، و هلم جرا .
– بتحب مصر ؟
– ما قلتلك مصر دي أمي .
– بتحب تمشي في شوارعها ؟؟
– أتمشى فين يا أستاذة ؟!! لا إله إلا الله .. إنتي مش من البلد دي ؟!!! مرور و زحمة و عادم سيارات و تحرش و خنقة و ناس مش طايقة نفسها و باعة جائلين هاتشتري منهم شئتي أم أبيتي .. الشوارع بقت صعبة أوي يا أستاذة .
– بتحب مصر ؟؟
– يووووووه .. بتنيل على عين أهلي بحبها .
– حاسس إنك مرتاح في العيشة في مصر و اللا نفسك تسافر تشتغل و تعيش بره .
– يااااااه .. حد يطول يسافر يا أستاذة ؟!!! السفر دلوقتي حلم بعيد ، و عقد العمل بره بيكلف الشئ الفلاني .. و السفر في البحر إنتي و نصيبك بقى .. بس عموما الموت في البحر أهون م الموت من الجوع و البطالة و الحوجة .
– بتحب مصر ؟!!
– يا دي النيلة السودة .. إنتي عايزة إيه يا ولية بالظبط ؟؟ تيت تيت تيت تيت تيت تيت تيت تيت تيت .
ملحوظة : تم استبدال الألفاظ النابية بكلمة تيت حرصا على الذوق العام .. و الكاتبة الحمد لله بخير و تتماثل للشفاء )
ملحوظة:
التدوينات المنشورة في مدونات هافينغتون بوست لا تعبر عن وجهة نظر فريق تحرير الموقع.
