هذه التدوينة تحتوي على كلمات بالعامية المصرية
* إزيك يا عم سعيد، إحنا قناة مصرية، عاوزين منك تقول لشعب مصر كلمتين حلوين.
– أحب أقول إحنا بقالنا 7 سنين عاملين ثورتين وبنلف في دايرة مش عارفين إحنا مين ولا فين؟!
ودايرة ماشية على كده، شوية يقولوا الدستور، آه عشان العجلة تدور، وشوية نعم للإسلام، وشوية نعم ضد الإرهاب، أحب أقول لكل أم أو أب وﻻدهم ماتت انت اللي غلطان، انتم اللي تركتوهم ينزلوا، ما هو حرام شرعاً الخروج على الحكام.
ولا أقول لك لا دول شهداء، دول همّا اللي غيروا التاريخ، ربنا يرحمهم.
وعاوز أقول كمان لكل واحد كان خايف على البلد ونزل في الثورة: انت قلت عيش.. حرية عدالة.. اجتماعية، إحنا مش عاوزين غير إننا نعيش بكرامة، نلاقي شغل كويس، ومستشفيات تداوينا، وقانون نتحامى فيه، وتعليم كويس وحياة كريمة.
ناس كتير أوي ماتت عشان تحقق الحرية، عشان خايفة على البلد، وناس منافقة بتلعب بالبلد، وناس بتوجهه ناس باسم الدين وناس بتوجهه، ناس باسم محاربة الإرهاب الناس بتموت في المستشفيات، مفيش عيش، مفيش أي حاجة، ده حتى النور لسَّه بيقطع لحد دلوقتي، ده أنا بقى عندي 40 سنة ولسه مش عارف أشتري شقة.. طيب هتجوز إزاي؟! ولا أروح أعاكس بنت، ولا أتحرش بيها، أصل أنا كبرت خلاص نفسي أتجوز، وأعيش حياة كريمة.
* لا إحنا عاوزينك تقول قد إيه إن الحياة حلوة يا عم سعيد، عشان نديك الشقة والعربية، وتتجوز يا عم سعيد ولا إيه؟!
– أحب أقول للناس كلها: مصر بلدنا حلوة أوي وهي قد الدنيا، وهتفضل قد الدنيا، وتسلم الزيادي
آه صح.. والعيش بقى حلو أوي، والرغيف كبير بيكفي أسرة بحالها، والأنابيب مش موجودة خلاص، أصل كل بيت فيه غاز طبيعي، والبنزين موجود في كل حتة، ده لدرجة إن أصحاب البنزينات رخصوا البنزين عشان نشتري من عندهم.
وكل الشباب اشتغل في الوظايف اللي عاوزها، والبنات اتجوزت ده لدرجة إن البنات دلوقتي بتنقي العريس.
ما أقولكش بقى عن المستشفيات.. بقت على أحسن مستوى عالمي ولا أوروبا يا جدع.
الدكاترة المصريين بقوا من أحسن الدكاترة في العالم وييجي الطلبة من كل دول العالم عشان تتعلم في مصر.
التعليم بقى الطلبة دلوقتي بقت تتعلم وهي في البيت، ومفيش غش ولا أي حاجة.
كل المصالح الحكومية ماشية بما يرضي الله، مفيش رشوة ولا محسوبية ولا ظلم.
كل الحريات بقت موجودة، والحمد لله.
وفي النهاية بنقول للناس كل سنة وانتو طيبين وسنة جديدة عليكم، ويا ترى هتبقى شكلها عامل إزاي!!
ملحوظة:
التدوينات المنشورة في مدونات هاف بوست لا تعبر عن وجهة نظر فريق تحرير الموقع.