ملاحظة: التدوينة بالعامية المصرية.
– صباح الخير يا بيبي.
* صباح النور.
– نفسي أخرج النهارده.. الجو جميل قوي.. ما تيجي نفطر برَّة ونروح نقعد ف أي مكان؟
* النهارده الجمعة وعايز أناااااام.. عايز أأنتخ كده من غير ما أعمل أي حاجة!
– ممممممم.. يعني مش هتنزل خالص؟
* ع المغرب كده هنزل أقعد مع عماد والشباب شوية ع القهوة.
– بس ده اليوم الوحيد اللي ممكن نخرج فيه يا هشام.. بجد نفسي أخرج!
* أرجوكي بلاش زن ونكد في الموضوع ده بقى!.. ده يوم الإجازة!
– ممممم.. مفيش مشكلة.. أنا هروح المطبخ أبدأ في الغدا.. فعلاً عندك حق.. بلاش نكد.
*******
– مساء الخير يا بيبي.. وحشتني.
* وحشتك؟! ههههههه.. أنا كنت في الشغل بس على فكرة!
– عارفة إنك كنت في الشغل بس وحشتني!
* ماشي يا ستي.. وانتي كمان وحشتيني.
– مش باين.
عموماً الأكل موجود ع السفرة ومستنياك.
* لا أصل أنا كلت مع عماد والشباب قبل ما آجي..
– كلت قبل ما تيجي؟!!.. ما انت عارف إني بستناك ناكل مع بعض!
* خلاص مش طالبة نكد!.. هاجي آكل معاكي أي حاجة وخلاص!
– لأ خلاص مش مشكلة.. هاكل أنا دلوقتي أي حاجة ونبقى نتعشى مع بعض.
(على العشا)
– بيبي صحيح، خطوبة إيمان صاحبتي بكرة وعزمتني أنا وأنت.
* لا لا خطوبة إيه! أنا برجع م الشغل هلكان ومش هنزل تاني!.. قولي لها تخليها يوم جمعة أو روحي انتي!
وبعدين بكرة احتمال أنزل مع عماد والشباب شوية نتفرج ع الماتش..
– خلاص يا بيبي مفيش مشكلة هروح أنا.
على فكرة أنا قرأت رواية حلوة قوي وخلصتها امبارح.
* ماشي.. عايزة إيه يعني؟
– فيها كام حاجة كده كنت عايزة أناقشها معاك..
* ما لقتيش غير دلوقتي؟.. أنا راجع م الشغل تعبان يا ريم وما فييش دماغ للروايات والكلام ده!
– مفيش مشكلة يا بيبي أنا بس كنت عايزة نتكلم مع بعض وإحنا بناكل.. طول اليوم قاعدة قدام التلفزيون مش بعمل حاجة.
* ممكن ناكل وإحنا ساكتين عادي على فكرة!
وبعدين ما تنزلي شغل يا ستي، حد قال لك اقعدي في البيت!
– ما أنا بدور على شغل مناسب ومش لاقية!
* خلاص اشغلي وقتك بحاجة مفيدة.. كورسات.. وظيفة.. هواية.. كده يعني.
أصل مش معقولة يعني يا ريم حياتك تبقى فاضية كده وتطلعي الفراغ ده عليا!.. الراجل بيحتاج مساحة كده يكون فيها لوحده!
– عندك حق جداً يا بيبي.. أنا آسفة ما تزعلش.
********
(بعد شهر)
– صباح الخير يا بيبي.
* صباح النور.. لابسة ع الصبح كده ورايحة فين؟ النهارده الجمعة!
– رايحة النادي مع هناء والبنات.
* من بدري كده؟!
– أيوة عشان نلحق يومنا؛ لأن ورانا حاجات كتير.
* حاجات؟! حاجات إيه؟
– رايحين اتيليه عامل ايفينت حلو قوي وبعدين هنروح سينما.
* اتيليه.. وسينما؟!
– أيوة مالك مستغرب كده؟
* ولا حاجة عادي يعني.. مستغرب بس إنك ما قولتيش آجي أنا معاكي!
– تحب تيجي معايا؟
* يا حبيبتي ما انتي عارفة إنه يوم الجمعة ده هو اليوم الوحيد اللي برتاح فيه!
– أيوة وعماد والشباب كمان ممكن يتضايقوا لو ما نزلتش المغرب معاهم ع القهوة.
* ياااااه.. بدأتي تفهميني يا روحي.
– طبعاً يا بيبي أُمال إيه!
* طيب.. ما تتأخريش بس.
– لا ما تخافش مش بحب أتأخر أنا أصلاً.
* طب فيه أكل ولا إيه؟
– طبعاً يا بيبي.. فيه أكل في التلاجة، ولو كسلت تسخن، اطلب من برَّة بقى.. باي.
*******
– مساء الخير يا بيبي.
* مساء النور.
– يااااااه اليوم كان جميل قوي.
* بس كده؟!
– أيوة بس.. فيه إيه؟
* ابداً مستغرب بس إنك مش هتحكي التفاصيل!
– لا مش عايزة أدوشك.. عادي حاجات ستات وكده..
* طيب.
بقول لك إيه، خطوبة عزت بكرة وعازمني.
– ألف ألف مبروك.. تمام.. لازم تروح طبعاً.
* أيوة ما إحنا هنروح.
– لا يا بيبي بكرة مش هقدر معلش.. روح انت وعماد والشباب.
* مش هتقدري ليه؟
– رايحة مع هبة للدكتورة.. بقالها فترة تعبانة وماما مش هتقدر تروح معاها.
* مممممم.. طب ماشي.. سلامتها هبة.
– الله يسلمك يا بيبي.
أنا هدخل أنام بقى عشان هلكانة من اليوم النهارده.
* إيه ده؟.. بدري كده؟.. مش هتقعدي تتفرجي معايا ع الفيلم؟
– لا معلش يا بيبي اتفرج انت، عشان هصحى بدري.
أقول لك، إيه رأيك تتصل بعماد والشباب ييجوا يتفرجوا معاك؟
* استني بس، تصحي بدري ليه؟!
– أصل أنا وهناء والبنات اتفقنا هنروح مدرسة تحفيظ قرآن سوا من بكرة إن شاء الله.
* تحفيظ قرآن؟.
مممم.. طيب يا حبيبتي ربنا يوفقك.
– وبعد بكرة عايزة أروح مع هناء والبنات نسأل على كورس إنجلش.. إيه رأيك؟
* كورس إنجلش؟!
ممممم.. أكيد طبعاً يا حبيبتي.. ماشي روحي.
– شكراً يا بيبي ربنا يخليك ليا.
هصحى الفجر عشان أطبخ الأسبوع كله وأنضف الشقة قبل ما أنزل.. وانت لما تيجي من الشغل سخن بس الأكل في الميكروويف.
* الأسبوع كله؟!.. ليه؟
– هو أنا ما قلتلكش؟!
* لا يا حبيبتي ما قلتيليش!
– أصل كورس الإنجلش ده هيكون فيه بعديه في نفس السنتر كورس فوتوشوب وأنا وهناء والبنات عايزين نروح.
بعد إذنك طبعاً يا حبيبي.
* مممممم.. مش كتير كده يا ريم؟
– لا يا بيبي ده منحة مجانية!
* مش على الفلوس بس يا حبيبتي!
– أمال إيه؟
* يعني…
– يعني إيه؟
* البيت يعني وكده!
– لا يا بيبي كله إلا البيت!
ما تقلقش خالص من الناحية دي!.. ولو حسّيت لحظة بس إني مقصرة في البيت هلغي كل الحاجات دي طبعاً!
* مممممم..
طب يا حبيبتي ربنا يوفقك!
******
– صباح الخير يا بيبي
* صباح النور.. لابسة بدري كده ورايحة فين؟
– ما أنا قلت لك أول امبارح إن عندي إنترفيو النهارده!
* إيه ده هو انتي كنتي بتتكلمي بجد؟!
– طبعاً، ههزر في موضوع زي ده ليه؟
* مش عارف بس أنا مجاش ف دماغي انك بتتكلمي بجد!
– لو مش عايز أو مش حابب الفكرة مش هروح يا بيبي!
* لا عادي أنا نسيت بس عشان كده مستغرب.. إنما عادي يا حبيبتي روحي.. ربنا يوفقك.
– أنا ملاحظة إنك بقالك كتير ما خرجتش مع عماد والشباب.. فيه حاجة؟
* لا أبداً عادي.. احتمال أشوفهم آخر الأسبوع.
– طب تمام..
الأكل في التلاجة.
باي بيبي.
********
– مساء الخير يا بيبي.
* مساء النور.. إيه يا ريم اتأخرتي!
– المواصلات والله يا بيبي معلش.
* مممممم.. ماشي.
طب سخني الأكل بقى عشان ناكل سوا.
– هسخنلك يا بيبي تاكل انت.. أصل أنا كلت مع هناء والبنات بعد الكورس.
* كلتي؟!
– أيوة..
* مممممم.
– شكلك زعلت!
* أنا؟؟.. لا خالص.
بس…
– بس إيه يا بيبي؟
* اصل إحنا بقالنا كتير قوي ما قعدناش مع بعض يا ريم!.. إحنا لِسَّه عرسان يعني يعتبر!
– مممممم.. انت شايف كده؟
* بصراحة آه!
– الراجل ده كائن غريب قوي يا هشام!!..
لا حقيقي يعني كائن غريب!
لما كنت متفرغة ليك وبتحايل عليك نخرج وناكل مع بعض ونقعد نتكلم كنت بتشتكي.. ولما شغلت نفسي وسيبتك براحتك خالص، بردو بتشتكي!.. وفي الآخر تقولوا على الستات نكدية!
* إيه كل ده؟!!.. وبعدين على فكرة بقى أنا عمري ما اشتكيت من اهتمامك!
– يا راجل!!.. طب قشطة، يلّا نخرج بكرة!
* لا بكرة مش هينفع، أصلي خارج مع عماد والشباب!
ـــــــــــــــــــ
فيه معادلة سحرية في منتهى الدقة للاهتمام بالحياة الزوجية.. لو زادت تبوظ ولو قلّت تبوظ.
الزوجة لازم يكون ليها عالم مستقل بعيد عن الزوج.. بس مش قوي.
الراجل لازم هيخرج مع عماد والشباب.. بس مش قوي.
اعرفوا المعادلة من الأول عشان تلتمسوا سبب من أسباب الراحة الزوجية.
ملحوظة:
التدوينات المنشورة في مدونات هافينغتون بوست لا تعبر عن وجهة نظر فريق تحرير الموقع.