ملحوظة: التدوينة بالعامية المصرية
بمناسبة ظهور أحمد الفيشاوي والضجة اللي عملها من انتقادات حابب أتكلم في كام نقطة:
– اللي كتير من الناس ما تعرفهوش إن أحمد الفيشاوي وأحمد الشقيري كانوا بيقدموا برنامج مع بعض وكان معاهم اتنين كمان اسمه (يلّا شباب) كان سنة 2002 وكان حاجة شبه (خواطر) اللي كان بيقدمها أحمد الشقيري.
– بعد 15 سنة من اجتماعهم مع بعض في الخير، واحد عمل 11 جزء من برنامج هو الأنجح في الوطن العربي، والأكثر مشاهدة، بسبب محتواه الهادف والحث على عمل الخير والعمل والأخلاقيات المفتقدة في المجتمع، والتاني ما اعترفش بابنه من علاقة عُرفية، ومن ثم اتجه للغناء، ومن بعد ظهوره في البرامج وافتخاره بضرب المخدرات والزنى.. إلخ.
– إيه اللي يخلي اتنين كانوا في عمل خيري سوا واحد يكمل والتاني يتقلب 180 درجة؟!
– فكرت كتير إيه اللي يخلي أحمد الفيشاوي يتحول كده؟ أو إيه اللي يخليه أصلاً يسيب الوسط بتاعه ويلتزم فترة؟
طب إيه اللي خلَّاه يرجع تاني بعد ما التزم؟
طب ليه أحمد الشقيري ما اتسحبش لسكة أحمد الفيشاوي؟
طب إزاي واحد كان ملتزم يبعد عن الالتزام؟
أقول لكم ليه أحمد الشقيري كان اتسأل في برنامج عن أحمد الفيشاوي، ورد قال: إن أحمد الفيشاوي شخص طيب جداً، وإن بعد مشكلة النسب دي قابله وحضنه وفضل يعيط، وقال له إن فضل يتصل بعدد كبير من الدعاة، ومحدش كان بيرد عليه، وإن الوسط الديني اتقفل في وشّه، ومحدش رحمه، وساعتها الوسط الفني هو اللي احتضنه وكمّل المشوار.
تخيَّل معايا كده لو كان حد من الدعاة أو اللي بيسموا نفسهم دعاة كان رد على أحمد الفيشاوي وقال له انت غلطت وتوب واستغفر ووقف جنبه لحد ما يقوم على رِجله.. كنا هنشوف أحمد الفيشاوي شخص ملتزم!
المشكلة في مجتمعنا إننا معندناش ثقافة التسامح، لو حد عمل غلطة بنفضل نذله بيها لحد ما يموت، وحتى لو عمل إيه كويس تكفيراً عن الغلطة دي بنفضل نفكّره كل شوية بغلطته لحد ما هو بيجيله اقتناع إنه مهما عملت مش هعرف أغير الصورة دي فبيتجه إلى إنه يؤكدها بكل ارتياحية.
ونفس الكلام لما واحد يكون مش ملتزم ويلتزم تلاقي الناس عمالة تقول انت هتعمل فيها عم الشيخ ويفكروه باللي كان بيعمله وينسوا كلام ربنا: “إِلَّا مَن تَابَ وَآمَنَ وَعَمِلَ عَمَلاً صَالِحاً فَأُولَئِكَ يُبَدِّلُ اللَّهُ سَيِّئَاتِهِمْ حَسَنَاتٍ وَكَانَ اللَّهُ غَفُوراً رَّحِيماً”.
أحمد الفيشاوي مش ضحية تربية قد ما هو ضحية ثقافة مجتمع.
الحلقة اللي اتكلم فيها أحمد الشقيري عن أحمد الفيشاوي:
ملحوظة:
التدوينات المنشورة في مدونات هاف بوست لا تعبر عن وجهة نظر فريق تحرير الموقع.
